Una Finestra sul mondo: poesia “La mia corsa” di Antimo Capuano

La mia corsa

Io  nun me crere proprio niente
Scrivo pe raccuntà  chelle ca tengo ccà  e ccà
Ma cchiù  chelle che  sta ‘o late  d’ ‘ o core
E allora sentite…
Tutte ‘e vvote ca scengo è sempe ‘a stessa cosa.
S’arape ‘o sipario e accumparene a uno a uno ‘e bellezze ‘e  mieze ‘a via
Mó  si  è fantasia  o  verità,  cheste nun vo saccie dicere
Ma ve dico ca chi corre pe  zone mie   adda pensà  ch’ è  overe figlie a Dio:
Passo pe vicino ‘a Chiesa, e llà  facenne ‘o segne  d’ a Croce, dico na preghiera a San Filippo e me raccumanne a chi saccie io.
Po vaco appriesse e ca  core ‘e ll’uocchie tenghe mente  a ‘
na fronne, è ‘o Glicine, sto aspettanne che  schioppa ‘o primme fiore, nun è ancora tiempe ma n’atu ppoco s’accumence ‘a sentì ll’addore.
Fore a  na  porta  ce sta na signora anziana  ca scopa mmano  e cu na santa pacienza accocchie ‘e foglie vecchie e pulezze ‘o rare.
Invece, vicino ‘o mare, ncoppe ‘o puorte, sciosce sempe ‘o viente, e si tengo ciorte n’apprufitte pe’ me fa vuttà.
E quanne aggire ‘a via, astregne ‘e riente e arranche p’a sagliute, chist’ è ‘o mumente ‘e  faticà.
Arrivate arete ‘a campagna, nu fiete esce ‘a dint’o pullare e ve dico ch’ overamente nun se po supportà .
Menumale ch’arriva ‘a discesa, che vene proprio pe m’aiuta.
‘E  n’fondo a tutto oicanne ‘o lago.
Ce sta ‘o vicchiarielle ch’ se sposte sott’o muro mentre  me dice :《 chianu chianu e accorte ‘a nun te stancà》
Intanto nu  cane  s’impressione e si nun fosse p’o padrone ch’ è lesto a ll’agguantà  nun ce avesse mise niente a me  muzzuccà.
‘A strada è ancora longa, però tengo genio e nun me voglio ancora fermà.
Me manco ‘o faro, a spiaggia, a  grotta antica e tanti ccose ‘a visità.
E ddoppo ‘o cuzzecare, ‘o bbar ch’ e guagliune ca  me sfottene pe pazzià.
Fernute ‘o mare, ‘o lago, vene ll’ora e me arrepusà.
Nu surse d’acqua,  nu poco ‘e zucchero e po via, mo m’ aggia arritirà .
N’ata sagliute e chesta vota ‘e ccosce nun ne  vonne sapé  ‘e faticà.
Ma io  allargo ‘o nase e piglie quante cchiù  aria pozze piglià.
Faccie ‘a stessa strada, veche ‘e stessi ccose,
addivente tutte tale e quale: ‘o fiete d’o pullare, ll’ addore ‘e quacche fiore, ‘o fummo dó furno che s ‘adda  avvià.
È po ancora  ‘a Chiesa, ‘sta vota aize sule a mano, ‘a preghiera  p’a stanchezza nun c’ha faccie ‘a recità.
Io nun me crere proprio niente,
però  fino ‘a quanno ‘o pozze fa,
astregne ‘e riente e arranche,
pecchè  me piace ‘a Libertà.

Antimo Capuano 

---

Tutti i racconti di Una Finestra sul Mondo. A cura di Monica Carannante

Chiunque desidera dare il proprio contributo può scriverci a: unafinestrasulmondo@montediprocida.com

La redazione pubblicherà nelle settimane successive, seguendo un calendario, vostro articolo che  dovrà  essere accompagnato almeno da una foto vostra o di terzi previa autorizzazione.

Oggetto della mail: titolo articolo. Nel corpo della mail inserire: nome/i e cognome/i degli autori dell’articolo e della/e foto/e  ed almeno un  recapito telefonico.